هل لدي مشكله بالادراك ?

السلام عليكم
مشكلتي اني مش حاسس بالوجود بمعني ان ديما محتاج افكر ان الكون مش صدفة ولا اعتباطا وان له خالق وبعدين محتاج افكر في الخالق والخ . وكل دا عارف انه موجود منطقيا وعلميا لكن مش حاسس دا وان حسيته واتظبطت ارجع تاني لنقطه الصفر وكأن شيئا لم يكن .ليه محتاج كل شوي ابرهن لنفسي وإن برهنت مبقاش حاسس

لدرجه لجأت اني اكتب تصوري وادله وجود الله بورقه عشان لما ارجع للصفر اقراها
حاسس ان عندي مشكله في الادراك والوعي..انا مؤمن ان الكون لابد وحتما له خالق بس مش مستوعب دا
زي ان حد قريبي يموت .. مثلا زي خالي او جدي بحزن وببكي اه لكن بكون مش مستوعب وبعد فترة بحس انه مكنش موجود اصلا وانه مجرد ذكري
ولما بفكر اني هموت مش مصدق دا ومش حاسس إنه هيحصل ومش مستوعب دا
لكن لما بحس بخطر الموت زي لما حصل لي حادث طريق ودخلت المستشفي حسيت بوقتها اني لازم ابحث واستقر وفعلا اتاملت وفكرت واتدبرت واستقريت ايمانيا لكن بعد فترة كأن شي لم يكن
ليه لما يجيلي شك بالوجود او الله واثبته بادله محسهاش وان حسيت الايمان ممكن بعد فترة اقل من يوم او ساعه حتي الاقيني بنفس الدوامه رجعت
وان قررت اني اعتبر اللي انا فيه وساوس وشكوك ولازم اتجاهلها وخصوصا انها لا تذهب بالبراهين ولا بستوعبها ولا بحسها فبستمر بالتجاهل وبقيم العبادات ومظاهر التقرب لله وبمنع نفسي عن الذنوب بحس اني منافق وبمثل وبكدب علي نفسي

اتمني رد علمي او نفسي اما ردود المشايخ زي ان الحل التجاهل او ان دا بسبب الذنوب والران علي القلب والخ جربتها
وشكرا لحضراتكم